10 oktyabr tarixində Yüksək Texnologiyalar Parkı, Təhsil İnkişafı Fondu və "SABAH.HUB" şirkətinin nümayəndələrinin iştirakı ilə Texnologiya transferi layihəsinin qaliblərinin təqdimat tədbiri keçirilib.

Tədbir çərçivəsində qalib komandalar öz layihələrini təqdim edərək prototiplərini nümayiş etdiriblər. Təqdimatlar zamanı iştirakçılar tərəfindən layihələrin texniki və innovativ tərəfləri ilə bağlı suallar səsləndirilib, həmçinin mövcud nəticələr və qarşıdakı mərhələlər ətrafında geniş müzakirələr aparılıb.

Görüşün məqsədi layihələrin hazırkı inkişaf mərhələsini qiymətləndirmək, növbəti addımları müəyyənləşdirmək və tərəfdaş qurumlar arasında əməkdaşlığın gücləndirilməsini təşviq etmək olub.

Texnologiya transferi layihəsinin qaliblərinin təqdimat tədbiri keçirilib

8 oktyabr tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ASAN İnnovasiyalar Mərkəzinin direktoru Vüsal Rüstəmov Elm və Təhsil Nazirliyinin Yüksək Texnologiyalar Parkının baş icraçı direktoru Nihat Məcidovun başçılıq etdiyi nümayəndə heyəti ilə görüş keçirib.

Görüşdə ASAN İnnovasiyalar Mərkəzinin və Yüksək Texnologiyalar Parkının fəaliyyəti, “SABAH.city” innovasiya şəhərciyi layihəsi, eləcə də mümkün əməkdaşlıq istiqamətləri müzakirə olunub.

Tərəflər gələcəkdə innovasiya ekosisteminin inkişafı, gənclərin yüksək texnologiyalar sahəsində bilik və bacarıqlarının artırılması, startap layihələrinin dəstəklənməsi istiqamətində birgə fəaliyyət imkanlarını nəzərdən keçiriblər.

Görüş çərçivəsində qonaqlar həmçinin “INNOLAND” İnkubasiya və Akselerasiya Mərkəzi, iLab, ASAN İnnovativ İnkişaf Mərkəzi və "Bilim Azərbaycan" layihəsinin fəaliyyəti ilə yerində tanış olublar. Qonaqlara mərkəzlərin həyata keçirdiyi layihələr, rezident startaplar və innovativ təşəbbüslər haqqında ətraflı məlumat verilib.

ASAN İnnovasiyalar Mərkəzində Yüksək Texnologiyalar Parkının nümayəndələri ilə görüş keçirilib

29 sentyabr - 1 oktyabr 2025-ci il tarixlərində Yüksək Texnologiyalar Parkının baş direktoru Nihat Məcidov, baş direktorun müşaviri Abutab Abbasova və "SABAH.HUB" şirkətinin idarə heyətinin üzvü Fərhad Paşayevdən ibarət Azərbaycanın nümayəndə heyətinin Türkiyənin aparıcı texnoparklarına səfəri çərçivəsində yeni işgüzar görüşlər keçirilib. Səfərin əsas məqsədi texnoparkların fəaliyyət istiqamətləri ilə tanış olmaq, beynəlxalq təcrübə mübadiləsi aparmaq və gələcək əməkdaşlıq imkanlarını müzakirə etmək olub.

Görüşlər çərçivəsində nümayəndə heyəti əvvəlcə “Teknopark İstanbul”u ziyarət edərək, Texnologiya, innovasiya və sahibkarlıq üzrə baş direktorun müavini Burak Keskik, “Cube Incubation” mərkəzinin müdiri Uraz Yekeler, işgüzar inkişaf üzrə məsul şəxs Salih Ötegen və digər əməkdaşlarla görüşüb. Səfər zamanı nümayəndələr “Cube Incubation” mərkəzinin fəaliyyəti, kommersiyalaşdırılan layihələr və texnoparkın laboratoriya imkanları ilə yaxından tanış olublar.

Daha sonra nümayəndə heyəti "Uğur Sağlık Teknolojileri" şirkətini ziyarət edərək, tibbi texnologiyalar sahəsində həyata keçirilən innovativ həllər barədə məlumat alıb və bu sahədə potensial əməkdaşlıq imkanlarını dəyərləndirib.

Səfərin növbəti ünvanı isə "İTÜ ARI Teknokent" olub. Burada nümayəndə heyəti şirkətin baş icraçı direktoru Prof. Dr. Atilla Dikbaş, “İTÜ Çekirdek” inkubasiya mərkəzinin direktoru Dr. Yunis Ismayıl, Texnologiya transfer ofisinin baş koordinatoru Serdar Çalış, Əməliyyat və layihə inkişafı üzrə direktoru Dr. Kutay Güneştepe və digər əməkdaşlar ilə görüşüb. Nümayəndələr həmçinin “İTÜ Magnet” və “İTÜ Çekirdek” mərkəzlərini ziyarət edərək startapların inkişafı üçün təqdim edilən dəstək mexanizmləri barədə ətraflı məlumat əldə ediblər.

Son olaraq nümayəndə heyəti “YTÜ Yıldız Teknopark”da baş direktor müavini Yusuf Emre Holoğlu, işgüzar inkişaf və korporativ əlaqələr üzrə menecer İbrahim Duru və digər əməkdaşlar ilə rəsmi görüşdə iştirak edərək əməkdaşlıq imkanları ilə bağlı fikir mübadiləsi aparıblar. Səfər çərçivəsində “YTÜ Startup House” tərəfindən innovativ şəxslərə təqdim edilən infrastruktura da baxış keçirilib.  

Beləliklə, həyata keçirilən bu görüşlər iki ölkə arasında innovasiya və yüksək texnologiyalar sahəsində əməkdaşlığın dərinləşməsinə, texnoparkların idarə olunması təcrübəsinin paylaşılmasına və startap ekosistemində yeni imkanların formalaşmasına zəmin yaradır.

Azərbaycan nümayəndə heyətinin Türkiyənin aparıcı texnoparklarına səfəri uğurla yekunlaşıb

29 sentyabr 2025-ci il tarixində Yüksək Texnologiyalar Parkının baş direktoru Nihat Məcidov, baş direktorun müşaviri Abutab Abbasova və "SABAH.HUB" şirkətinin idarə heyətinin üzvü Fərhad Paşayevdən ibarət Azərbaycanın nümayəndə heyəti Türkiyənin ən geniş texnologiya inkişaf mərkəzlərindən biri olan “Bilişim Vadisi”ni ziyarət edib. 

“Bilişim Vadisi”nin baş icraçı direktoru Erkam Tüzgen, beynəlxalq münasibətlər üzrə direktoru Sezen Güngör və ekosistem, layihələrin monitorinqi və digər şöbələrin əməkdaşlarının iştirakı ilə keçirilən görüşdə qurumun fəaliyyəti, innovativ təşəbbüsləri, gələcək planları, layihələrin seçilməsi, qiymətləndirilməsi və monitorinqi mexanizmləri təqdim olunub. Səfər çərçivəsində “Bilişim Vadisi”ndə yerləşən bir sıra innovativ şirkətlər, o cümlədən “SAHA” və “ILGEAI” ziyarət edilib. Görüşlər zamanı nümayəndə heyəti, şirkətlərin təcrübəsi, onların texnoparka daxil olma hekayələri, inkişaf prosesləri və burada əldə etdikləri üstünlüklər barədə ətraflı məlumat alıb. 

Səfər yekununda tərəflər əməkdaşlıq imkanlarını müzakirə edib və Azərbaycan ilə Türkiyə arasında yüksək texnologiyalar və innovasiya sahəsində qarşılıqlı əməkdaşlığın gücləndirilməsinin əhəmiyyətini vurğulayıblar.

Yüksək Texnologiyalar Parkı və “SABAH.HUB” nümayəndə heyəti “Bilişim Vadisi”ni ziyarət edib

29 sentyabr 2025-ci il tarixində Yüksək Texnologiyalar Parkının baş direktoru Nihat Məcidov, baş direktorun müşaviri Abutab Abbasova və "SABAH.HUB" şirkətinin idarə heyətinin üzvü  Fərhad Paşayevdən ibarət Azərbaycanın nümayəndə heyəti ilə “Marmara Teknokent”in baş direktoru Mehmet Ali Okur, baş direktor müavini Deniz Yayla, TTO rəhbəri Dr. Tuğba İnanç Horuz, inkubasiya şöbəsinin rəhbəri Kübra Altay və TTO üzrə mütəxəssis Rasim Keskin və digər əməkdaşlar arasında işgüzar görüş keçirilib.

Görüş çərçivəsində qurumların fəaliyyət istiqamətləri, rezident qəbulu və izlənilməsi prosesi, texnologiya transferi, inkubasiya və akselerasiya mexanizmləri, həmçinin texnoparkların idarəetmə modelləri müzakirə olunub. Tərəflər mentorluq və beynəlxalq əməkdaşlıq imkanlarının genişləndirilməsi ilə bağlı fikir mübadiləsi aparıblar. Nümayəndə heyəti səfər çərçivəsində “Marmara Teknokent”in “GO IDEA Girişim Ofisi” ilə də tanış olub. 

Bu səfər, Azərbaycan və Türkiyə arasında texnoparklar sahəsində əməkdaşlığın gücləndirilməsi, ikitərəfli əlaqələrin qurulması və gələcəkdə ortaq layihələrin həyata keçirilməsi üçün mühüm rol oynayır.

Yüksək Texnologiyalar Parkı “Marmara Teknokent” ilə əməkdaşlıq imkanlarını müzakirə edib

Patent hüququ sahəsində ən çox rast gəlinən anlayışlardan ikisi ixtira və faydalı modeldir. Hər ikisi texnoloji inkişafı dəstəkləyən hüquqi mexanizmlər olsa da, onların tətbiq sahələri, hüquqi xüsusiyyətləri və qoruduqları texniki həllərin miqyası bir-birindən fərqlənir. İxtira anlayışı daha genişdir və müxtəlif sahələrdə texniki problemlərin yaradıcı şəkildə həllini əhatə edir. Buraya yeni qurğular, maddələr, üsullar və texnologiyalar daxildir. İxtira patentləri yüksək yenilik dərəcəsi və orijinallığı olan texnoloji həllərin hüquqi qorunması üçün nəzərdə tutulur. Bu səbəbdən onlar adətən elmi-tədqiqat, sənaye, innovasiya və yüksək texnologiyalar sahəsində mühüm rol oynayır.

Faydalı model isə daha sadə və tətbiqi yönümlü texniki həlləri əhatə edir. Faydalı model patentləri yalnız qurğulara və onların texniki təkmilləşdirilməsinə aiddir. Məsələn, mövcud bir cihazın konstruktiv dəyişikliklər vasitəsilə daha funksional hala gətirilməsi faydalı modelin predmetinə daxil olur. Onun əsas üstünlüyü patentləşdirmə prosesinin daha sadə və sürətli olmasıdır. Bu səbəbdən faydalı model patentləri istehsalatda, mühəndislikdə və gündəlik texniki yeniliklərdə geniş istifadə olunur.

İxtira və faydalı model arasındakı əsas fərq onların mürəkkəblik dərəcəsi və tətbiq sahəsindədir. İxtira patentləri daha fundamental və kompleks texnoloji həlləri qoruyursa, faydalı model patentləri sadə, praktik və tez tətbiq edilə bilən texniki yeniliklərin qorunmasına xidmət edir. Buna görə də seçim zamanı yaradılan həllin miqyası, yenilik dərəcəsi və tətbiq sahəsi nəzərə alınmalıdır.

Nəticə olaraq, əgər siz yeni texnologiya, üsul və ya məhsul yaratmısınızsa, ixtira patenti sizin üçün daha uyğun olacaq. Mövcud qurğuların və cihazların təkmilləşdirilməsi üçün isə faydalı model patentindən istifadə etmək daha məqsədəuyğundur. Hər iki hüquqi mexanizm sizin ideyanızı qorumaq, bazarda rəqabət üstünlüyü qazanmaq və innovasiyanı təşviq etmək üçün əhəmiyyətli alətdir.

Faydalı model və ixtiranın fərqi nədir?

23 sentyabr 2025-ci il tarixində Elm və Təhsil Nazirliyinin Yüksək Texnologiyalar Parkında Ekspertlər Şurasının iclası baş tutub. İclasda Şura üzvlərinə parkın son bir ildəki fəaliyyəti, həyata keçirilmiş layihələr və gələcək planlar barədə məlumat təqdim olunub.

İclas zamanı rezidentlik üçün müraciət edən iki namizəd öz innovativ biznes layihələrini təqdim edib. Layihələr texnoparkın fəaliyyət profilinə uyğunluğu, layihənin elmi tədqiqatların və təcrübə-konstruktor işlərinin həyata keçirilməsi, innovasiya məhsulunun və ya yüksək texnologiyaların hazırlanması, işlənilməsi və təkmilləşdirilməsi sahəsində prioritetlərə uyğunluğu, həmçinin yüksək texnologiya və ya innovasiya yönümlülüyü baxımından müzakirə olunub və müraciətləri barədə Şura üzvləri tərəfindən müvafiq qərar verilib.

Rezidentlərin texnoparka cəlb edilməsi ölkəmizdə innovasiya ekosisteminin inkişafı, startapların dəstəklənməsi və yüksək texnologiyalar əsasında fəaliyyət göstərən bizneslərin təşviqi baxımından mühüm addım kimi dəyərləndirilir. Bu proses həm gənc sahibkarların ideyalarının reallaşdırılması, həm də elmi-tədqiqat nəticələrinin kommersiyalaşdırılması üçün yeni imkanlar açır.

Yüksək Texnologiyalar Parkında Ekspertlər Şurasının iclası keçirilib

23 sentyabr 2025-ci il tarixində Elm və Təhsil Nazirliyinin Yüksək Texnologiyalar Parkının (YTP) Ekspertlər Şurasının üzvləri YTP-nin ərazisində inşa olunacaq “SABAH.city” innovasiya şəhərciyinin birinci fazasının tikinti prosesinə baxış keçiriblər.

YTP-nin baş direktoru Nihat Məcidov tərəfindən Şura üzvlərinə burada aparılan tikinti işləri barədə ətraflı məlumat verilib. Bildirilib ki, “SABAH.city” innovasiya mühiti üçün nəzərdə tutulmuş müasir infrastruktur və yaradıcı məkanları ilə startapların, texnologiya şirkətlərinin, ali təhsil müəssisələrinin və elmi tədqiqat qruplarının fəaliyyətinə geniş imkanlar yaradacaq.

Ekspertlər Şurası “SABAH.city” innovasiya şəhərciyi ilə tanış olub

24 sentyabr 2025-ci il tarixində İnnovasiya və Rəqəmsal İnkişaf Agentliyinin təşkilati dəstəyi ilə Ukrayna Respublikasının Rəqəmsal inkişaf nazirinin müavininin rəhbərlik etdiyi nümayəndə heyəti, eləcə də Ukraynanın aparıcı İT və texnologiya şirkətlərinin nümayəndələri ilə görüş keçirilib.

Görüş çərçivəsində qonaqlara hazırda Yüksək Texnologiyalar Parkında inkişaf etdirilən “SABAH.city” innovasiya şəhərciyi layihəsi təqdim olunub. Təqdimat zamanı layihənin əsas məqsədləri, planlaşdırılan infrastruktur həlləri, regionda innovasiya ekosisteminin inkişafına və sahibkarlıq mühitinə verəcəyi töhfələr barədə ətraflı məlumat verilib.

Tərəflər həmçinin iki ölkə arasında innovasiya, rəqəmsal texnologiyalar və İT sahəsində əməkdaşlıq imkanlarını müzakirə ediblər. Qeyd olunub ki, belə görüşlər beynəlxalq təcrübə mübadiləsinə, birgə layihələrin təşviqinə və texnologiya əsaslı iqtisadiyyatın inkişafına mühüm töhfə verir.

Ukraynanın İT şirkətlərinin nümayəndələri ilə görüş keçirilib

Azərbaycan Respublikasının Elm və Təhsil Nazirliyinin Yüksək Texnologiyalar Parkının (bundan sonra - YT Park) daha səmərəli idarə olunmasını təmin etmək məqsədilə operatorun seçilməsi üçün müsabiqə elan edilir.

Azərbaycan Respublikası Elm və Təhsil Nazirliyinin Yüksək Texnologiyalar Parkı haqqında qısa məlumat: Yüksək Texnologiyalar Parkı Azərbaycan Respublikası Prezidentinin 8 noyabr 2016-cı il tarixli, 2425 nömrəli Sərəncamı ilə yaradılmışdır. YT Parkın yaradılmasında əsas məqsəd ölkə iqtisadiyyatının davamlı inkişafına və rəqabət qabiliyyətinin artırılmasına, müasir elmi və texnoloji nailiyyətlərə əsaslanan innovasiya və yüksək texnologiyalar sahələrinin genişləndirilməsinə, elmi tədqiqatların aparılması və yeni texnologiyaların işlənməsi üzrə müasir komplekslərin yaradılmasına dövlət dəstəyinin gücləndirilməsidir.

YT Parkın əsas fəaliyyət istiqamətləri texnologiya transferi, startaplara və innovativ bizneslərə dəstək göstərilməsi, inkubasiya və akselerasiya mərkəzlərinin təşkili və təşviqindən ibarətdir. Eyni zamanda, elmi tədqiqatların kommersiyalaşdırılması və rezidentlərin fəaliyyətinin təşkili də onun prioritetləri sırasındadır. YT Park ali təhsil müəssisələri və elmi-tədqiqat institutları ilə sıx əməkdaşlıq edərək, elmi tədqiqatların nəticələrinin praktiki həllərə çevrilməsinə və bazara çıxarılmasına şərait yaradır. YT Parkın məqsədi Azərbaycanın tədqiqat, inkişaf və innovasiya sahəsində lider strukturlarından birinə çevrilməsidir.

Müsabiqə yolu ilə seçiləcək operatorun əsas fəaliyyət istiqamətləri aşağıdakılardan ibarət olacaq:

- YT Parkın fəaliyyəti üçün ayrılmış ərazinin istifadəyə yararlı vəziyyətə gətirilməsi;
- YT Parkın infrastrukturunun yaradılması;
- inkubator və texnologiya transferi mərkəzinin yaradılması;
- rezident və digər investorların cəlb edilməsi məqsədilə işlərin aparılması;
- fəaliyyət profilinə uyğun olaraq, innovasiya məhsulunun və yüksək texnologiyaların
hazırlanması, işlənilməsi və təkmilləşdirilməsi üçün elmi tədqiqatların və təcrübəkonstruktor işlərinin həyata keçirilməsi ilə bağlı xidmətlərin göstərilməsi.

Müsabiqə iştirakçılarına dair tələblər:

- İştirakçı Azərbaycan Respublikasının qanunvericiliyinə uyğun olaraq yaradılmış, müqavilə bağlamaq hüququna malik və 1 milyon Azərbaycan manatı məbləğində ödənilmiş nizamnamə kapitalına malik hüquqi şəxs olmalıdır;
- İştirakçı məhkəmə qərarları ilə müflis elan olunmayan və ya bu prosedura başlanmayan, habelə fəaliyyəti dayandırılmayan hüquqi şəxs olmalıdır.

Müsabiqəyə təqdim olunacaq sənədlərin qəbulu 22 avqust 2025-ci il, saat 17:00-dək YT Parkda həyata keçiriləcəkdir. Müsabiqə predmetinə dair texniki tapşırıq, iştirakçılar üçün təlimat, qiymətləndirmə meyarları və təklif forması “Müsabiqənin Şərtlər toplusu”nda öz əksini tapmışdır. Şərtlər toplusunu əldə etmək istəyən şəxslər həmin tarixədək iş saatlarında təmsil etdikləri qurumun dövlət qeydiyyatı haqqında şəhadətnaməsinin, reyestr çıxarışının, nizamnaməsinin və öz şəxsiyyət vəsiqəsinin surətlərini YT Parka təqdim etməklə onu əldə edə bilərlər.

Əlaqə: (+99412) 3766756 (Daxili: 102)
Ünvan: Bakı şəhəri, Xətai rayonu, Kazımağa Kərimov küçəsi 221
E-mail: a.abbasova@ytp.az (Abutab Abbasova)

Haqqımızda

Xidmətlər

Media

Elm, təhsil və biznesin qovuşduğu məkan

Elm, təhsil və biznesin qovuşduğu məkan

Elm, təhsil və biznesin qovuşduğu məkan

Xidmətlər

Ümumi məlumat

Media

Tərəfdaşlar

Əlaqə

Haqqımızda

Xidmətlər

Media