Universitet təhsili dövründə real iş təcrübəsi qazanmaq istəyən tələbələr üçün yeni imkan yaradılıb. Yüksək Texnologiyalar Parkı və “SABAH.academy”,  dəyərli tərəfdaşlarımız DHL və Q-STP ilə birgə tələbələr üçün strukturlaşdırılmış təcrübə proqramına start verir.

“SABAH.city” innovasiya şəhərciyi layihəsi daxilində həyata keçirilən təcrübə proqramının əsas məqsədi tələbələrin universitetdə əldə etdikləri nəzəri bilikləri real iş və sənaye mühitində tətbiq etmələrinə şərait yaratmaq, onların peşəkar bacarıqlarını inkişaf etdirmək və əmək bazarının tələblərinə uyğun mütəxəssis kimi formalaşmasına dəstək göstərməkdir.

Hal-hazırda vakansiyaların açıq olduğu istiqamətlər aşağıdakı kimidir:
▪️ Maliyyə və inzibati işlər
▪️ Əməliyyatlar və təchizat zənciri
▪️ Satış və müştəri xidmətləri
▪️ Sağlamlıq və təhlükəsizlik
▪️ İnsan resursları
▪️ Planlama

Proqram əsasən müvafiq ixtisaslar üzrə təhsil alan 3-cü və 4-cü kurs tələbələri üçün nəzərdə tutulub.

Namizədlər müraciət forması vasitəsilə maraqlandıqları vakansiyanı seçərək müraciət edə bilərlər. 
https://forms.gle/YXvkkdQ8SLPdL3mEA 

Axtarılan istiqamət üzrə uyğun vakansiya mövcud olmadığı halda, namizədlər maraq göstərdikləri sahəni müraciət formasında qeyd edə bilərlər. Təqdim olunan məlumatlar gələcək imkanlar üzrə namizədlərin nəzərdən keçirilməsi məqsədilə saxlanılacaq. 

Qeyd edək ki, vakansiyalar mütəmadi olaraq, hər həftə yenilənəcək. İlkin seçim mərhələsini uğurla keçən namizədlər növbəti mərhələdə müsahibəyə dəvət olunacaqlar.

Yüksək Texnologiyalar Parkı və “SABAH.academy” tələbələr üçün strukturlaşdırılmış təcrübə proqramına start verir

İnnovasiya ekosistemlərini birləşdirən və Azərbaycanda fəaliyyət göstərən startapların beynəlxalq bazarlara çıxışını dəstəkləyən “NEXUS Launchpad” proqramına müraciət açıqdır! Yüksək Texnologiyalar Parkı və “SABAH.lab” əməkdaşlığı çərçivəsində və “SABAH.city” innovasiya şəhərciyi layihəsi daxilində həyata keçirilən proqram yerli startapların qlobal genişlənməsini sürətləndirməyi hədəfləyir.

Proqram çərçivəsində startaplar “NEXUS”un beynəlxalq tərəfdaş şəbəkəsi vasitəsilə Türkiyə, Qazaxıstan, İsrail və digər tərəfdaş ölkələrdə fəaliyyət göstərən innovasiya ekosistemlərinə çıxış, uyğun bazarlarda inkişaf və beynəlxalq əməkdaşlıq imkanları əldə edəcəklər.


Proqram iştirakçıları ehtiyaclarına uyğun aşağıdakı imkanlardan faydalana biləcəklər:
- İnfrastruktur və iş sahəsinə çıxış
- Mentorluq və biznes dəstəyi
- Hüquqi və inzibati dəstək
- Netvörkinq və müvafiq ekosistemə inteqrasiya
- Yerli bazar və biznes mühiti ilə tanışlıq


Proqram üçün ideal namizədlər:
- Texnologiya yönümlü startaplar (3–7 il təcrübə üstünlükdür)
- Bazarda təsdiq və ilkin inkişaf (traction) əldə etmiş komandalar
- Böyümə potensialı olan güclü MVP
- Beynəlxalq genişlənmə üçün maliyyə baxımından hazır olanlar
- Ən azı 2 nəfərlik komandalar
- Regional bazarlara daxil olmağa hədəfləyən ciddi komandalar


Proqram çərçivəsində seçilmiş startapların tərəfdaş ölkələrdə müəyyən müddət fəaliyyət göstərməsi və proqram fəaliyyətlərində fiziki iştirak etməsi nəzərdə tutulur.


Müraciət üçün keçidə daxil olun:
https://sabahhub.com/nexus-program/

Azərbaycandakı startapların qlobal bazarlara çıxışını dəstəkləyən “NEXUS Launchpad” proqramına müraciət açıqdır

Azərbaycan Respublikasında süni intellekt sahəsində dövlət prioritetlərinin həyata keçirilməsi istiqamətində mühüm addım atılır. 2025–2028-ci illəri əhatə edən Süni İntellekt Strategiyasına uyğun olaraq, “SABAH.city” innovasiya ekosistemi daxilində və ADNSU nəzdində Təhlükəsiz və Etibarlı Süni İntellekt üzrə Tədqiqat İnstitutu yaradılır.

Layihə Azərbaycan Respublikasında süni intellektin inkişafı üzrə müəyyən edilmiş milli prioritetlərə, eləcə də 2025–2028-ci illəri əhatə edən Süni İntellekt Strategiyasına uyğun olaraq həyata keçiriləcək. İnstitutun fəaliyyəti süni intellekt texnologiyalarının tətbiqi ilə yanaşı, bu sistemlərin təhlükəsizliyi, etibarlılığı və etik çərçivədə istifadəsi üzrə elmi-tədqiqat işlərini də əhatə edəcək.

Yeni institut süni intellekt və intellektual sistemlər üzrə fundamental və tətbiqi araşdırmaların aparılması, müasir texnoloji həllərin qiymətləndirilməsi, eləcə də dövlət və özəl sektor üçün ekspertiza və analitik dəstəyin göstərilməsi istiqamətində fəaliyyət göstərəcək. İnstitutun əsas fəaliyyət istiqamətlərinə kompüter görməsi və avtonom sistemlər, dil və nitq texnologiyaları, süni intellektin təhlükəsizliyi və etibarlılığı, həmçinin rəqəmsal transformasiya proseslərinin təhlili və dəstəklənməsi daxildir.

“SABAH.city” ekosistemində yerləşəcək institut elmi mühit, innovasiya infrastrukturu və təhsil imkanlarını birləşdirərək yüksək ixtisaslı mütəxəssislərin hazırlanmasına, insan kapitalının inkişafına və texnoloji suverenliyin möhkəmləndirilməsinə töhfə verməyi hədəfləyir. Layihənin uzunmüddətli perspektivdə dövlət idarəetməsində səmərəliliyin artırılmasına, iqtisadi və sənaye inkişafının sürətləndirilməsinə xidmət edəcəyi gözlənilir.

“SABAH.city”də ADNSU nəzdində Süni İntellekt üzrə yeni tədqiqat institutu yaradılacaq

"ASAN xidmət"in “İnnovasiyalar Mərkəzi” “SABAH.city” layihəsinə qoşulur.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” ilə Azərbaycan Respublikasının Elm və Təhsil Nazirliyinin Yüksək Texnologiyalar Parkı arasında Anlaşma Memorandumu imzalanıb.

Memorandumu “İnnovasiyalar Mərkəzi”nin direktoru Vüsal Rüstəmov və Yüksək Texnologiyalar Parkının baş icraçı direktoru Nihat Məcidov imzalayıblar.

Tərəflər Anlaşma Memorandumu çərçivəsində qarşılıqlı maraq doğuran sahələrdə səmərəli, davamlı və ikitərəfli əməkdaşlığın qurulmasını əsas məqsəd kimi müəyyən ediblər.

Razılaşmaya əsasən, “ASAN AI Hub” Yüksək Texnologiyalar Parkının bazasında yaradılan “SABAH.city” innovasiya şəhərciyində fəaliyyət göstərəcək və ölkəmizdə süni intellekt ekosisteminin formalaşmasına, dayanıqlı inkişafına xidmət edəcək.

Memorandum tərəflərin birgə fəaliyyətə dair niyyətini ifadə edir və ölkəmizdə innovasiya mühitinin gücləndirilməsinə töhfə verməyi hədəfləyir.

"ASAN xidmət"in “İnnovasiyalar Mərkəzi” “SABAH.city” layihəsinə qoşulur

23 dekabr tarixində Yüksək Texnologiyalar Parkı, “SABAH.HUB” və Çin Xalq Respublikasının Fudan Universitetinin  nümayəndə heyəti ilə görüş keçirilib. Görüş zamanı Azərbaycan ilə Çin arasında ali təhsil, elmi tədqiqat və texnoloji innovasiyalar sahələrində potensial əməkdaşlıq imkanları ətrafında geniş fikir mübadiləsi aparılıb.

Görüş zamanı müvafiq təşəbbüslərin həyata keçirilməsi üçün strateji platforma kimi “SABAH.city” layihəsi təqdim edilib. Tərəflər “SABAH.city”nin yüksək texnologiyalar, startaplar, tədqiqat mərkəzləri və sənaye tərəfdaşlıqları üçün yaratdığı imkanları müzakirə edərək, bu modelin beynəlxalq təcrübə ilə sintezinin əhəmiyyətini vurğulayıblar. Xüsusilə texnopark infrastrukturu, innovativ istehsal və texnologiya transferi sahələrində əməkdaşlıq perspektivləri ön plana çıxıb.

Görüş qarşılıqlı anlaşma və gələcək əməkdaşlıq niyyətlərinin ifadə olunması ilə yekunlaşıb.

YTP və Fudan Universitetinin nümayəndə heyəti görüşüb

Elm və təhsil nazirinin müvafiq əmri ilə Abutab Abbasova və Emin İsmayılov Yüksək Texnologiyalar Parkının baş icraçı direktorunun müavinləri vəzifələrinə təyin ediliblər.

Abutab Abbasova ADA Universitetində beynəlxalq münasibətlər ixtisası üzrə bakalavriat təhsili alıb, Qlazqo Universitetində tələbə mübadilə proqramında iştirak edib, SOAS London Universitetində isə inkişaf elmləri üzrə magistratura təhsilini başa vurub. O, əmək fəaliyyətinə Xəzər Universitetində başlayıb. 2019-cu ildən etibarən Azərbaycan Respublikasının Təhsil İnstitutunda müxtəlif vəzifələrdə çalışıb, 2021–2024-cü illərdə həmin qurumun Təhsildə innovasiyalar şöbəsinin müdiri olub. Bununla yanaşı, Böyük Britaniya, Belçika Krallığı və ABŞ-da müxtəlif müəssisələrdə iş təcrübəsi qazanıb. A. Abbasova 2024-cü ildən indiyədək Yüksək Texnologiyalar Parkının baş icraçı direktorunun müşaviri vəzifəsini icra edib. Hazırda Bakı Dövlət Universitetində müəllim kimi də fəaliyyət göstərir.

Emin İsmayılov Türkiyənin Koç Universitetində biznesin idarəedilməsi ixtisası üzrə bakalavriat təhsili alıb və həmin ali təhsil müəssisəsində sahibkarlığın inkişafı üzrə ixtisaslaşma proqramını tamamlayıb.Əmək fəaliyyətinə Baker Tilly Azerbaijan şirkətinin Biznes Məsləhətləri departamentində başlayıb. Daha sonra PAŞA Həyat Sığorta şirkətinin Strategiya və İnvestisiya departamentində fəaliyyət göstərib. Təyinatadək SABAH.HUB İnnovasiya Mərkəzinin Strategiya və Layihələrin İdarəolunması departamentində çalışıb.

Yüksək Texnologiyalar Parkına direktor müavinləri təyin olunub

Yüksək Texnologiyalar Parkının dəstəyi ilə ötən həftə “DeserTech & Climate Innovation Center” nümayəndə heyətinin Bakıya səfəri çərçivəsində bir sıra aparıcı şirkət və qurumlarla görüşlər keçirilib. Səfər müddətində "Pasha Holding", "AgroDairy", "SOCAR Green", "Azersun", "Azərbaycan Dövlət Su Ehtiyatları Agentliyi" və digər təşkilatlarla müzakirələr aparılaraq innovativ həllər, dayanıqlı texnologiyalar və potensial əməkdaşlıq imkanları nəzərdən keçirilib.

Qeyd edək ki, görüşlər “SABAH.city” layihəsinin “NEXUS” proqramı çərçivəsində baş tutub. Azərbaycan innovasiya ekosisteminin qlobal bazarlara inteqrasiyasını dəstəkləyən proqram, “SABAH.city” vasitəsilə beynəlxalq startapların və texnologiya yönümlü şirkətlərin ölkə bazarına daxil olmasına, yerli startap və texnoloji şirkətlərin isə xarici bazarlara çıxışına imkan yaratmağı hədəfləyir.

Səfər zamanı aparılan müzakirələrin gələcəkdə qarşılıqlı faydalı, uzunmüddətli və strateji əməkdaşlıqlar üçün əlverişli zəmin yaradacağı gözlənilir.

"NEXUS" proqramı çərçivəsində "DeserTech" nümayəndə heyəti Azərbaycanın aparıcı şirkətləri ilə görüşdü

17 noyabr tarixində Yüksək Texnologiyalar Parkı ilə İsrailin “DeserTech & Climate Innovation Center” şirkəti arasında Anlaşma Memorandumu imzalanıb. Su ehtiyatlarının səmərəli idarə olunması, dayanıqlı kənd təsərrüfatı, bərpa olunan enerji və davamlı infrastruktur sahələrində innovativ həllər üzərində çalışan “DeserTech”, bu istiqamətdə fəaliyyət göstərən startap və texnologiyalar üçün akselerasiya proqramları təşkil edir, həmçinin sahibkarları, korporasiyaları, akademik və dövlət strukturlarını bir araya gətirərək real innovasiyaların birgə inkişafını və pilotlaşdırılmasını dəstəkləyir. Şirkəti səfərdə Sivan Cohen Shachari (Baş İcraçı Direktor, DeserTech & Climate Innovation Center) və Harry Leff (İcraçı Direktor, AYA Strategic) təmsil edir.

Yüksək Texnologiyalar Parkının “SABAH.city” layihəsinin “NEXUS” proqramı çərçivəsində 17-19 noyabr tarixlərində təşkil olunan səfərin məqsədi “DeserTech” şirkətini yerli dövlət və özəl qurumları ilə tanış etmək, proqram çərçivəsində mümkün əməkdaşlıq imkanlarını müzakirə etməkdir. Qeyd etmək lazımdır ki, “NEXUS” proqramı Azərbaycan innovasiya ekosisteminin qlobal bazarlara inteqrasiya olunmasını təmin etməyi hədəfləyir. Bu çərçivədə “SABAH.city” beynəlxalq startapların və texnologiya yönümlü şirkətlərin Azərbaycan bazarına daxil olmasına, yerli startap və texnoloji şirkətlərin isə beynəlxalq bazarlara çıxışına dəstək göstərməyi planlaşdırır.

Səfərin ilk günü “SABAH.HUB” innovasiya mərkəzi və “SABAH.city” layihələri ilə tanış olan nümayəndə heyəti növbəti günlərdə Pasha Holdinq, AgroDairy, SOCAR Green, Azersun və digər qurumlarla görüşlər keçirəcək.

İsrailin “DeserTech” mərkəzi ilə Anlaşma Memorandumu imzalanıb

10 oktyabr tarixində Yüksək Texnologiyalar Parkı, Təhsil İnkişafı Fondu və "SABAH.HUB" şirkətinin nümayəndələrinin iştirakı ilə Texnologiya transferi layihəsinin qaliblərinin təqdimat tədbiri keçirilib.

Tədbir çərçivəsində qalib komandalar öz layihələrini təqdim edərək prototiplərini nümayiş etdiriblər. Təqdimatlar zamanı iştirakçılar tərəfindən layihələrin texniki və innovativ tərəfləri ilə bağlı suallar səsləndirilib, həmçinin mövcud nəticələr və qarşıdakı mərhələlər ətrafında geniş müzakirələr aparılıb.

Görüşün məqsədi layihələrin hazırkı inkişaf mərhələsini qiymətləndirmək, növbəti addımları müəyyənləşdirmək və tərəfdaş qurumlar arasında əməkdaşlığın gücləndirilməsini təşviq etmək olub.

Texnologiya transferi layihəsinin qaliblərinin təqdimat tədbiri keçirilib

8 oktyabr tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ASAN İnnovasiyalar Mərkəzinin direktoru Vüsal Rüstəmov Elm və Təhsil Nazirliyinin Yüksək Texnologiyalar Parkının baş icraçı direktoru Nihat Məcidovun başçılıq etdiyi nümayəndə heyəti ilə görüş keçirib.

Görüşdə ASAN İnnovasiyalar Mərkəzinin və Yüksək Texnologiyalar Parkının fəaliyyəti, “SABAH.city” innovasiya şəhərciyi layihəsi, eləcə də mümkün əməkdaşlıq istiqamətləri müzakirə olunub.

Tərəflər gələcəkdə innovasiya ekosisteminin inkişafı, gənclərin yüksək texnologiyalar sahəsində bilik və bacarıqlarının artırılması, startap layihələrinin dəstəklənməsi istiqamətində birgə fəaliyyət imkanlarını nəzərdən keçiriblər.

Görüş çərçivəsində qonaqlar həmçinin “INNOLAND” İnkubasiya və Akselerasiya Mərkəzi, iLab, ASAN İnnovativ İnkişaf Mərkəzi və "Bilim Azərbaycan" layihəsinin fəaliyyəti ilə yerində tanış olublar. Qonaqlara mərkəzlərin həyata keçirdiyi layihələr, rezident startaplar və innovativ təşəbbüslər haqqında ətraflı məlumat verilib.

Haqqımızda

Xidmətlər

Media

Media

Haqqımızda

Xidmətlər

Media