Azərbaycan Respublikasının Elm və Təhsil Nazirliyinin Yüksək Texnologiyalar Parkının (bundan sonra - YT Park) daha səmərəli idarə olunmasını təmin etmək məqsədilə operatorun seçilməsi üçün müsabiqə elan edilir.

Azərbaycan Respublikası Elm və Təhsil Nazirliyinin Yüksək Texnologiyalar Parkı haqqında qısa məlumat: Yüksək Texnologiyalar Parkı Azərbaycan Respublikası Prezidentinin 8 noyabr 2016-cı il tarixli, 2425 nömrəli Sərəncamı ilə yaradılmışdır. YT Parkın yaradılmasında əsas məqsəd ölkə iqtisadiyyatının davamlı inkişafına və rəqabət qabiliyyətinin artırılmasına, müasir elmi və texnoloji nailiyyətlərə əsaslanan innovasiya və yüksək texnologiyalar sahələrinin genişləndirilməsinə, elmi tədqiqatların aparılması və yeni texnologiyaların işlənməsi üzrə müasir komplekslərin yaradılmasına dövlət dəstəyinin gücləndirilməsidir.

YT Parkın əsas fəaliyyət istiqamətləri texnologiya transferi, startaplara və innovativ bizneslərə dəstək göstərilməsi, inkubasiya və akselerasiya mərkəzlərinin təşkili və təşviqindən ibarətdir. Eyni zamanda, elmi tədqiqatların kommersiyalaşdırılması və rezidentlərin fəaliyyətinin təşkili də onun prioritetləri sırasındadır. YT Park ali təhsil müəssisələri və elmi-tədqiqat institutları ilə sıx əməkdaşlıq edərək, elmi tədqiqatların nəticələrinin praktiki həllərə çevrilməsinə və bazara çıxarılmasına şərait yaradır. YT Parkın məqsədi Azərbaycanın tədqiqat, inkişaf və innovasiya sahəsində lider strukturlarından birinə çevrilməsidir.

Müsabiqə yolu ilə seçiləcək operatorun əsas fəaliyyət istiqamətləri aşağıdakılardan ibarət olacaq:

- YT Parkın fəaliyyəti üçün ayrılmış ərazinin istifadəyə yararlı vəziyyətə gətirilməsi;
- YT Parkın infrastrukturunun yaradılması;
- inkubator və texnologiya transferi mərkəzinin yaradılması;
- rezident və digər investorların cəlb edilməsi məqsədilə işlərin aparılması;
- fəaliyyət profilinə uyğun olaraq, innovasiya məhsulunun və yüksək texnologiyaların
hazırlanması, işlənilməsi və təkmilləşdirilməsi üçün elmi tədqiqatların və təcrübəkonstruktor işlərinin həyata keçirilməsi ilə bağlı xidmətlərin göstərilməsi.

Müsabiqə iştirakçılarına dair tələblər:

- İştirakçı Azərbaycan Respublikasının qanunvericiliyinə uyğun olaraq yaradılmış, müqavilə bağlamaq hüququna malik və 1 milyon Azərbaycan manatı məbləğində ödənilmiş nizamnamə kapitalına malik hüquqi şəxs olmalıdır;
- İştirakçı məhkəmə qərarları ilə müflis elan olunmayan və ya bu prosedura başlanmayan, habelə fəaliyyəti dayandırılmayan hüquqi şəxs olmalıdır.

Müsabiqəyə təqdim olunacaq sənədlərin qəbulu 22 avqust 2025-ci il, saat 17:00-dək YT Parkda həyata keçiriləcəkdir. Müsabiqə predmetinə dair texniki tapşırıq, iştirakçılar üçün təlimat, qiymətləndirmə meyarları və təklif forması “Müsabiqənin Şərtlər toplusu”nda öz əksini tapmışdır. Şərtlər toplusunu əldə etmək istəyən şəxslər həmin tarixədək iş saatlarında təmsil etdikləri qurumun dövlət qeydiyyatı haqqında şəhadətnaməsinin, reyestr çıxarışının, nizamnaməsinin və öz şəxsiyyət vəsiqəsinin surətlərini YT Parka təqdim etməklə onu əldə edə bilərlər.

Əlaqə: (+99412) 3766756 (Daxili: 102)
Ünvan: Bakı şəhəri, Xətai rayonu, Kazımağa Kərimov küçəsi 221
E-mail: a.abbasova@ytp.az (Abutab Abbasova)

Azərbaycan Respublikası Elm və Təhsil Nazirliyinin Yüksək Texnologiyalar Parkının operatorunun seçilməsi ilə bağlı müsabiqə elan edilir

İnnovasiya ekosistemini dəstəkləmək üçün insan kapitalını inkişaf etdirmək, yeni elmi nailiyyətlər qazanmaq üçün tədqiqatları təkmilləşdirmək, biliyin təcrübədə tətbiqi üçün akademiya-sənaye əməkdaşlığını təşviq etmək, həmçinin bilik iqtisadiyyatı üzrə iş yerləri yaratmaq məqsədilə Yüksək Texnologiyalar Parkının tikilməsi və idarə edilməsi üzrə İqtisadiyyat Nazirliyi investorları dövlət-özəl tərəfdaşlığı layihəsində iştiraka dəvət edir.

Nazirlər Kabinetinin 11 iyul 2025-ci il tarixli Sərəncamı ilə 2026-cı il üzrə dövlət-özəl tərəfdaşlığı layihələrinin siyahısı təsdiq edilib. Siyahıya əsasən təhsil, ətraf mühit, qida təhlükəsizliyi, su, turizm və nəqliyyat sahələrində strateji əhəmiyyət daşıyan layihələrin özəl sektorla sıx əməkdaşlıq formasında həyata keçirilməsi planlaşdırılır. 

Yüksək Texnologiyalar Parkı ilə bağlı layihədə özəl tərəfdaş tərəfindən parkın tikilməsi, 30 il müddətinə idarə edilməsi və Azərbaycan Respublikasının Elm və Təhsil Nazirliyinə həvalə edilməsi nəzərdə tutulur. Layihə 3 mərhələdən ibarətdir. Artıq 1-ci mərhələnin icrasına başlanılıb. Layihənin 2-ci və 3-cü mərhələlərinin dövlət-özəl tərəfdaşlığı çərçivəsində icrası planlaşdırılır. 

Layihəyə dair ətraflı məlumat texniki-iqtisadi əsaslandırma sənədlərinə əsasən tərtib olunacaq şərtlər toplusunda əks etdiriləcəkdir. Layihəyə maraq göstərən potensial investorların keçiddə (https://bit.ly/ytpifaem) əksini tapan müraciət formasını doldurub bildirilən müddət ərzində ppp@economy.gov.az elektron poçt ünvanına göndərmələri xahiş olunur.

İnvestorlar üçün yenilik var!

11 iyul tarixində YTP və 4SİM arasında Anlaşma Memorandumu imzalanıb.

Bu əməkdaşlıq, texnologiya və innovasiya sahəsində birgə fəaliyyətin genişləndirilməsini, qarşılıqlı təcrübə mübadiləsinin təşviq olunmasını və yeni layihələrin birgə həyata keçirilməsini hədəfləyir.

Tərəflər arasında formalaşan bu əməkdaşlıq münasibətləri ekosistemin davamlı inkişafına töhfə verəcək, yerli və beynəlxalq miqyasda rəqabətqabiliyyətli texnoloji həllərin ortaya çıxmasına imkan yaradacaq.

Rəqəmsal gələcəyə doğru atılan bu addım güclü tərəfdaşlığın əsasını qoyur.

YTP və 4SİM arasında Anlaşma Memorandumu imzalanıb

Yüksək Texnologiyalar Parkının (YTP) və Bakı Avrasiya Universitetinin (BAU) birgə təşkilatçılığı ilə 8 iyul 2025-ci il tarixində “TT Talks” vebinarlar silsiləsi çərçivəsində “Ali təhsil müəssisələrində elmin kommersiyalaşdırılması” mövzusunda vebinar keçirilib.

Tədbirdə YTP-nin İnkubasiya və texnologiyaların transferi mərkəzinin baş mütəxəssisi Ramin Əkbərov spiker qismində çıxış edib.

Vebinar zamanı Ramin Əkbərov elmin kommersiyalaşdırılmasının universitetlər və tədqiqatçılar üçün əhəmiyyətindən bəhs edərək, "Spin-off", "Incubator", "Accelerator" və AKBANK LAB kimi anlayışların innovasiya, startap və korporativ texnologiya sahələrində geniş istifadə olunmasını, onların hər birinin fərqli məqsədlərə xidmət etməsini diqqətə çatdırıb.

Eyni zamanda universitetlərin innovasiya mühitində rolu, yeni ideyaların biznesə çevrilməsi mexanizmləri və elm–sənaye əməkdaşlığının perspektivləri geniş müzakirə olunub. İnteraktiv şəkildə keçən vebinarda sual-cavab sessiyası təşkil olunub, iştirakçılar tərəfindən verilən suallar cavablandırılıb. Tədbir BAU-nun professor-müəllim heyəti, doktorant və magistrantları tərəfindən böyük maraqla qarşılanıb.

“Ali təhsil müəssisələrində elmin kommersiyalaşdırılması” mövzusunda vebinar keçirilib

Azərbaycan Respublikası Elm və Təhsil Nazirliyinin Yüksək Texnologiyalar Parkının təşəbbüsü və təşkilatçılığı, Təhsilin İnkişafı Fondu və “SABAH.HUB” İnnovasiya Mərkəzinin tərəfdaşlığı ilə həyata keçirilən “Texnologiyaların transferi” proqramının nəticələri açıqlanıb.

Proqramın məqsədi ali təhsil və elmi-tədqiqat müəssisələrində fəaliyyət göstərən ixtiraçı, tədqiqatçı və innovatorların ideya, konsepsiya və hüquqi cəhətdən qorunan texnologiyalarını funksional həllərə və yüksək kommersiyalaşdırma potensialına malik məhsullara çevrilməsi prosesinə dəstək verməkdir.
Layihə çərçivəsində ümumilikdə 76 müraciət qəbul olunub. Texniki ekspertiza mərhələsini uğurla keçən 17 layihə növbəti mərhələyə vəsiqə qazanıb. Bu mərhələdə müstəqil ekspertlərlə müsahibələr təşkil olunub və layihələr elmi əsaslandırma, texnologiyanın tətbiqi mümkünlüyü, mövcud həllərlə müqayisədə innovativliyi, sənayenin real problemlərini həll etmə qabiliyyəti və bazarda mövcud həllərlə müqayisədə üstünlükləri kimi meyarlar üzrə dəyərləndirilib.

Qiymətləndirmə nəticəsində 5 layihə qalib elan olunub. Qalib komandalar texnoloji həllərinin kommersiyalaşdırılması üçün zəruri dəstək və məsləhət xidmətləri ilə təmin olunacaqlar.

“Texnologiyaların transferi” proqramı yerli tədqiqatçılar və startaplar üçün innovasiyaların bazara çıxarılması istiqamətində mühüm platforma olaraq çıxış edir və ölkədə elmtutumlu iqtisadiyyatın formalaşmasına töhfə verməyi hədəfləyir.

“Texnologiyaların transferi” proqramının nəticələri elan olunub

3 iyun 2025-ci il tarixində SOCAR Green və Elm və Təhsil Nazirliyinin Yüksək Texnologiyalar Parkı arasında davamlı inkişaf, yaşıl texnologiyalar və innovasiya sahələrində əməkdaşlığın gücləndirilməsinə dair niyyət protokolu imzalanıb.

Bu tərəfdaşlıq Azərbaycanda tədqiqatların təşviqi, bərpa olunan enerji sahəsində təşəbbüslərin dəstəklənməsi və ekoloji cəhətdən məsuliyyətli texnoloji inkişafa töhfə verilməsi ilə yanaşı, “SABAH.city” layihəsi çərçivəsində Yaşıl Enerji üzrə Tədqiqat və İnkişaf Laboratoriyasının yaradılmasını da nəzərdə tutur. Bu əməkdaşlıq, SOCAR Green-in Azərbaycanda həyata keçirdiyi bərpa olunan enerji təşəbbüslərinin inkişafına dəstək olmaqla yanaşı, “SABAH.city”nin texnologiya və innovasiya sahəsindəki inkişaf missiyasını daha da gücləndirəcək.

Yüksək Texnologiyalar Parkı və “SOCAR Green” şirkətləri arasında əməkdaşlıq qurulub

27 may 2025-ci il tarixində “ABB Innovation” ilə Elm və Təhsil Nazirliyinin Yüksək Texnologiyalar Parkı (YTP) arasında niyyət protokolu imzalanıb. Sənədi “ABB Innovation”un baş direktoru Həsən Eminov və Yüksək Texnologiyalar Parkının baş direktoru Nihat Məcidov imzalayıblar.

Razılaşmaya əsasən, “ABB Innovation” “SABAH.city” innovasiya şəhərciyində fəaliyyət göstərəcək və burada startapların inkişafı, innovativ ideyaların gerçəkləşdirilməsi, texnologiya yönümlü təşəbbüslərin təşviqi və təlim proqramlarının keçirilməsinə dəstək verəcək.

Tərəfdaşlıq çərçivəsində gələcəkdə rəqəmsal transformasiyanın dəstəklənməsi, ixtisaslaşmış kadrların hazırlanması və yerli ideyaların real bazara çıxışı üçün yeni imkanların yaradılması planlaşdırılır. Bu əməkdaşlıq “SABAH.city”nin ölkənin aparıcı innovasiya mərkəzlərindən birinə çevrilməsinə xidmət edəcək.

Yüksək Texnologiyalar Parkı və “ABB Innovation” şirkətləri arasında əməkdaşlıq qurulub

7 may 2025-ci il tarixində Elm və Təhsil Nazirliyinin Yüksək Texnologiyalar Parkı (YTP) ilə qlobal texnologiya nəhəngi Huawei Azərbaycan arasında əməkdaşlığa dair anlaşma memorandumu imzalanıb.

Sözügedən memorandum, tərəflər arasında gələcək əməkdaşlıq istiqamətlərini müəyyən edir və birgə təşəbbüslərin həyata keçirilməsi üçün rəsmi çərçivə yaradır.

Əməkdaşlıq çərçivəsində Huawei Azərbaycan, təqdim etdiyi qabaqcıl texnoloji həllər və innovativ yanaşmalarla həm Yüksək Texnologiyalar Parkının ekosisteminin inkişafına, həm də “SABAH.city” layihəsinə dəyər qatacaq. Bu tərəfdaşlıq texnologiya və təhsil sahəsində sinerji yaratmaqla, ölkədə rəqəmsal transformasiyanın sürətləndirilməsinə xidmət edəcək.

Yüksək Texnologiyalar Parkı və Huawei Azərbaycan arasında əməkdaşlığa dair anlaşma memorandumu imzalanıb

6 may 2025-ci il tarixində Elm və Təhsil Nazirliyinin Yüksək Texnologiyalar Parkı ilə rahat və effektiv nəqliyyat həlləri təqdim edən Yango Azərbaycan şirkəti arasında niyyət protokolu imzalanıb. 

Bu sənəd tərəflər arasında gələcək əməkdaşlıq imkanlarını rəsmiləşdirir və birgə təşəbbüslərin həyata keçirilməsi üçün möhkəm təməl yaradır.

Əməkdaşlıq çərçivəsində Yango Azərbaycan şirkəti Yüksək Texnologiyalar Parkında fəaliyyət göstərəcək və Parkın innovasiya yönümlü ekosisteminin ayrılmaz hissəsinə çevriləcək. 

Yüksək Texnologiyalar Parkı və Yango Azərbaycan arasında qurulan bu tərəfdaşlıq nəqliyyat texnologiyaları və ağıllı həllər sahəsində yenilikçi yanaşmaların dəstəklənməsi və inkişaf etdirilməsi istiqamətində mühüm addım hesab olunur.

Yüksək Texnologiyalar Parkı ilə Yango Azərbaycan arasında əməkdaşlığa dair niyyət protokolu imzalanıb

2025-ci il aprelin 10-da Elm və Təhsil Nazirliyinin Yüksək Texnologiyalar Parkı ilə “Proxima Tech Solutions” və “Proxima Cyber Security” şirkətləri arasında əməkdaşlığa dair niyyət protokolu imzalanıb.

Bu əməkdaşlıq çərçivəsində hər iki şirkət Yüksək Texnologiyalar Parkının ekosisteminə qoşularaq qabaqcıl İT infrastrukturu və kibertəhlükəsizlik sahəsində fəaliyyət göstərəcəklər. Şirkətlərin iştirakı Parkda innovasiya və texnologiya yönümlü inkişafa əhəmiyyətli töhfə verəcək.

Bu tərəfdaşlıq yüksək texnologiyalar sahəsində yeni imkanların formalaşmasına, həmçinin milli rəqəmsal potensialın gücləndirilməsinə xidmət edən strateji addım kimi qiymətləndirilir.

Haqqımızda

Xidmətlər

Media

Media

Haqqımızda

Xidmətlər

Media